Perarem perkawinan

 

   

PERAREM DESA PAKRAMAN PENGOTAN

INDIK PAWIWAHAN

Palet I

Indik Galah

Pawos 1

(1)      Galah Pawiwahan, kemargiang nyabran sasih Kapat lan sasih Kedasa, turmaning sampun wenten  wak-wakan  sakeng dulu desa.

(2)           Manut pabuat Desa Pakraman.

Palet II

Indik Genah

Pawos 2

(1)   Upacara Pawiwahan kemargiang ring Pura Penataran Agung Desa Pakraman Pengotan.

(2)     Yening Kebanda pemargi ring Pura Penataran Agung Desa Pakraman Pengotan, Upacara Pawiwahan  dados kemargiang ring Pura Bale Agung  Desa Pakraman Landih lan Desa Pakraman Pemutran, manut pidabdab Dulu Desa lan Prajuru Desa Pakraman Pengotan.

Palet III

Indik Pidabdab

Pawos 3

Pidabdab pemargi pawiwahan  :

(1)           Krama desa sane jagi ngemargiang pawiwahan kepatutang nunas pemargi lan dewasa ring dulu desa.

(2)           Pemargi Memadik mesarana canang sedah utawi taksu , sane kemargiang olih keluarga purusa marep keluarga pradana.

(3)           Risampun memargagi ketekan kaping kalih (2) keluarga purusa kepatutang mapinunas ring dulu desa, lan Prajruru Desa, mesrana canang taksu, nguningang ring sajeroning jagi ngemiletin pemargi pawiwahan.

(4)           Ring sajeroning ngamargiang ketekan kaping (3) ring ajeng, kapatutang kasarengin antuk karma pengarep keluarga soang-soang.

(5)           Indik pemargi canang kaputan pesadok akeh nyane  telulas tanding  sane katur majeng ring :

a.      Pengendek tumbak asiki katur ring dulu desa sane ngeraksa.

b.      Pengendek pemalungan asiki katur ring dulu desa sane ngeraksa.

c.      Katur ring dulu bale agung bedawan lelima.

d.      Katur ring dulu bale agung gelagah patpat.

e.      Katur ring Jro Bendesa asiki.

f.       Katur ring Jro Mekel asiki.

(6)           Indik pemergi canang kaputan peplakuan akeh nyane limang (5) tanding  sane katur majeng :

a.      Kaputan Ngidih-mekidiang kekalih, katur ring jero Bendesa lan Jero Mekel.

b.      Kaputan Peplakuan Kekalih, katur ring Jero Bendesa lan Jero Mekel.

c.      Kaputan penunas suaran kulkul asiki, katur majeng Jero Mekel.

(7)           Indik pemargi bakti, inggih punika :

a.      Canang pemakbak asoroh.

b.      Canang pejatian ring glagah asoroh medaging sesari Rp 20.000. (duang dasa tali rupiah ).

c.      Canang Pejatian asoroh medaging sesari, katur ring Sanggar Agung Bedawan taler medaging gegaden.

d.      Plangkabaan, Mebiyu buluh utawi biyu kayu 20 (duang dasa) bulih, yening kirang dados katuku antuk jinah. Taler medaging jinah bolong 275 (satak telung beang) keteng Sane 75(telung benang) katur ring  jero dulu glagah.

e.      Peserah sari ( nasi peserah ), manut pabuat

f.       Canang Pelisan, runtutan nebah Banteng.

(8)           Pemargi peplakuan, keluarga purusa lan keluarga pradana matemuang baos ring sejaroning ngerincikan jagi naur bakti peserah lan bakti dande pakerang.

(9)           Krama Desa Pakraman Pengotan, Landih, Pemutran, Sekardadi, lan Palaktiying, sane ngamargiang pawiwahan, lan ngaturang bakti peserah mesrana banteng,  kangkat sareng-sareng (ngarojong) olih soang-soang sane ngamargiang pawiwahan.

(10)        Risampun wusan ngemargiang pawiwahan ring Pura Penataran Agung, sang mawiwaha  ngelanturang ngemargiang pebratan salami 3 (tigang) rahina ring puri soang-soang, utawi manut pebuat .

(11)        Risampun tutug pemargi pebratan kelanturang antuk pemargi temu pewarangan (bantal tipat) lan mepejati utawi manut pemargi.

   

Pawos  4

(1)           Sang mawiwaha patut muputang bebaosan majeng ring :

a.      Prajuru Teruna.

b.      Prajuru Desa.

c.      Prajuru Utsaha Desa.

(2)           Sang Mawiwaha patut muputang indik peserah.

Palet IV

Indik Tiyos Agama

Pawos 5

(1)  Yening sang purusa mawiwit saking desa pakraman pengotan, sane pradana saking tiyos agama Hindu, kepatutang ngemargiang suddhi wadani.

(2)  Yening sang pradana sakeng desa pakraman pengotan, sane purusa saking tiyos agama Hindu, kedadosang ngemargiang pawiwahan  nyibakin.

Palet V

Indik Sasipatan lan Peserah

Pawos  6

Sapasira ugi Krama sane mawiwahe patut naur danda sasipatan lan pengelamuk kerta mekadi ketekan ring sor :

(1)           Krama sane jagi nyaregin pawiwahan sane muyusa kirang ring pelekutus (18) tiban keni sasipatan akeh nyane Rp. 1.500.000,- (Ayuta Lima Atus tali Rupiah).

(2)           Krama sane jagi nyarengin pawiwahan sane muyusa kirang ring pelekutus (18) tiban, tur sampun mobot keni sasipatan akeh nyane Rp. 3.000.000,- (Tigang Yuta Rupiah) lan keni sasipatan  Pengelamuk Kerta akehnyane Rp. 50.000,- (Seket Tali Rupiah) nyabran asasih.

(3)           Ring Krama sane jagi nyaregin pawiwahan sane muyusa sampun langkung  ring pelekutus (18) tiban, tur sampun mobot keni sasipatan akeh nyane Rp. 1.000.000,- (Ayuta Rupiah) lan sasipatan  Pengelamuk Kerta  Rp. 50.000,- (Seket Tali Rupiah) nyabran asasih.

(4)           Ring Krama sane jagi nyaregin pawiwahan, sane sampun embas putra kapatutang ngaturang bakti sapuh-sapuh panca sata kalih soroh ring Pura Pen      ataran Agung.

(5)           Sasipatan  Pengelamuk Kerta, wantah dados kamargiang se-akeh akehne 20 (duang dassa) sasih

(6)           Krama Desa sane jagi ngemaduang lan sampun madue sentana lanang, keni sasipatan pengingun banjar lan dados ketuku antuk jinah akeh nyane 2.000.000,- (Kalih Yuta Rupiah).

(7)           Krama Desa sane jagi ngemargiang pawiwahan, mamuuk kekeran kerta, keni sasipatan akeh nyane Rp. 1.500.000,- (Ayuta limangatus tali rupiah).

Pawos 7

Indik Peserah

(1)           Krama tamiu sane ngambil lan mawiwaha ring desa pakraman pengotan kepatutang naur peserah lan dados katuku antuk jinah  akeh nyane Rp. 3.000.000,- (Tigang Yuta Rupiah). Ten nyarengin manut ring Pawos 3 ketekan kaping sia (9).

(2)           Yening pemargi pawiwahan sane purusa nyeburin ketios desa (pekidih) indik pemargi sesipatan manut ketekan kaping (1) ring ajeng.

Pawos 8

Pamutus ring sajeroning sasipatan, pengelamuk kerta kemanggalaning olih Jero bendesa Desa Pakraman Pengotan ring paruman dulu lan Prajuru Desa rikala  sang maduwe keluarga nyadokang lan makta canang sedah pengendek ring ajeng Dulu Desa lan Prajuru Desa.

Pawos 9

Ring pemargi temu pewarangan tiyos desa patut kaupasaksi olih Kelihan Banjar Adat, Bendesa utawi Prajuru Desa Pakraman Pengotan, Kepala Kewilayahan, lan Perbekel Desa Pengotan.

Palet VI

Indik Penerag

Pawos 10

Penerag kemargiang rikala :

(1)  Wenten krama sane meayah ayahan semalihe sampun wenten wak wakan duase sakeng dulu desa jagi memargi Pawiwahan nangin ipun ten ngemargiang canang sedah, kapatutang ngemargiang pawiwahan (keterag).

(2)  Yening ketekan kaping siki (1) ten kemargiang, kedadosang ngemargiang nganten nyibakin.

(3)  Pemutus ketekan kaping siki (1) ring ajeng, kapidabdabin lan kebaosin ring Paruman Dulu Desa lan Prajuru Desa.  

 

Palet VI

Indik Pangwales Pedagingan

Pawos 11

(1)           Sane kawastanin pangwales pedagingan inggih punika, pengewales pengrauhan.

(2)           Daging pedagingan inggih punika :

a.      Beras a rontong.

b.      Nyuh kekalih.

c.      Gula a kilo.

d.      Jaja a siki.

(3)           Sane kedasarin antuk uleman, pariindikan pengwales pedagingan memargi sekadi patut.

(4)           Sane kedasarin antuk manah tresna, nenten kepatutang ngemargiang pengwales, gumanti kedasarin silih asih.

(5)           Sane kedasarin antuk  Ayah-ayahan karya kadadosang ngawales antuk sengkelean

(6)           Pamargi sekadi ketekan  ring ajeng kapatutang kemargiang ring sajeroning karya manusa yadnya.

Pawos 12

Sakeluirin sane durung kasurat ring pararem puniki patut pamutuse nginutin pasuara paruman krama Desa Pakraman Pengotan.

Palet VII

Nguah Nguwehin Pararem

Pawos 13

Nguah Nguwehin Pararem lan pidabdab sane jagi kemargiang kepatutang wenten pemutus paruman karma Desa Pakraman Pengotan.Antuk

Pengotan, 7 Maret 2018 Bendesa Pakraman Pengotan, I Wayan Kopok

Petajuh, Guru Sempiar	Penyarikan/Juru Surat I Wayan Darmawan	Petengen/Juru raksa, I Ketut Karcis
Pengromba B.Parhyangan, I Ketut Suarno	Pengeromba B.Pawongan, I Wayan Partana	Pengeromba B.Palemahan, I Wayan Parma

Kl.Br. Pakraman Padpadan, I Ketut Sarta	Kl.Br. Pakraman Penyebeh, I Nengah Buda	Kl.Br. Pakraman Besenga, I Nyoman Ripta	Kl.Br. Pakraman Sunting, I Wayan Perten
Kl.Br. Pakraman Yoh, I Ketut Wates	Kl.Br. Pakraman Dajan Umah, I Wayan Mertia	Kl.Br. Pakraman Delod Umah , I Wyn Sudiarsa	Kl.Br. Pakraman Tiyingdesa, I Wayan Carem