Ekalikita Desa Adat Pengotan 2004

I  BABAD LAN LAMBANG

1.1  KAWIT WENTEN DESA PAKRAMAN PENGOTAN

Desa Pakraman puniki maduwe wawidangan 8 (kutus) Banjar Pakraman sane jimbar wawidangannya sawetara wenten 8,7 Km nyraken tur maduwe wates sisi Kangin Desa Pakraman Langkan, sisi Kelod Desa Pakraman Palaktiying, sisi Kauh Desa Pakraman Sekaan lan sisi Kaja Desa Pakraman Kedisan.

Mungguing sastra sane maosin pariindikan kawit Desa Pakraman Pengotan nyantos mangkin durung pastika kauningin duaning sastra sane maosin indike punika mekadi prasasti utawi lontar-lontar durung kapanggih nyantos mangkin. Sakewanten manut bawos para panglingsir sane wenten ring Desa Pakraman Pengotan tur kepastikayang antuk cihna bukti sane wenten ring Desa Pakraman Pengotan, raris bawos punika keanggen unteng ngalintihang kawit Desa Pakraman Pengotan.

Kabaosang duke riin cacah jiwa ring desa Pakraman Pengotan wantah kesah saking Desa Pakraman Muteran, Kecamatan Rendang, Kabupaten Karangasem, kala punika tan ketangehan Krama ring Desa Pakraman Muteran kejarah olih Raja Panji Sakti saking jagat Buleleng. Prawerti kapertama sane kamargiang saking Raja Panji Sakti, nepak Gong Bebende sane kabakta antuk prajurit idane, sane prasida ngawinang Krama Desa Muteran punika biuta lan aruara. Raris wenten apah tiga langkung Krama Desa Pakraman Muteran punika matilar nyujur wawidangan jagat Bangli.

Kasuwen-suwen Krama Desa Muteran jenek ring Bangli kocap sampun rahajeng pisan, makajalaran prasida raris krama punika ngemargiang tata titining pakraman ring Bangli, minakadinne matetanduran, maubuh-ubuhan, taler prasida ngwangun wangunan suci, sane katamian rauh mangkin minakadi Pura Puseh ring Banjar Pule, Pura Dalem ring Banjar Kawan taler sampun madue setra sane sampun ketah mangkin kewastanin Setra Pemuteran. Kawentenan krama sayan lami sayan ngakehang kawentenannyane ring Bangli raris tan dumade saget wenten silih sinunggil krama Muteran maparilaksana sane tan patut inggih punika ngarereh buah kelapa ring karang duwen Ida Raja Bangli sakemaon tan pasadok ring sang maduwe karang. Ritepengan ipun ngalap buah kelapa punika raris katangehan ring krama sane tiosan, mawastu ipun masepan-sepan pacang tedun raris ipun nyepeg papah kelapane kaanggen serana tedun mangda lempas ring pamidanda Ida raja Bangli. Mawit saking biutene punika raris Ida Raja Bangli ngamedalang bisama, mangdene panjak idane sane saking Muteran, kesah saking jagat Bangli, tur kaicen genah antuk ida irika ring sisi Kaler jagat Bangli ring telenging wana sane bet tur akeh madaging taru ageng-ageng. Duaning asapunika panjak idane saking Muteran tan purun tulak, sahasa raris nyujur genahe punika sinambi mundut Ida Bhatara Sakti Pingit, serana tetabuhan sane kabaos Pinara Pitu, genta miwah sane tiosan. Maka cutetnyane irika raris Krama Muteran ngrabas alase kaanggen genah ngwangun pakubon saha makarya tegalan genah matetanduran lamakane prasida ipun nyambung kahuripannyane.

Yadian panjak idane saking Muteran punika sampun kesah, Ida Raja Bangli setata eling tur setata ida nodya kawentenan panjake sane wenten ring telenging wana. Ri kanjekan ida macecingak manggihin panjake  ngrabas alas, akeh ton ida irika wenten taru lateng sane sampun borok wit kateda antuk ipun i subatah maka cihna wenten makanten tedan ipun sane matumpuk-tumpuk waluya sekadi oot. Kawit punika raris Ida Raja Bangli ngicenin genahe punika aran Pengotan, sane ketah mangkin mawasta Desa Pakraman Pengotan.

1.2.      Palambang Desa Prakraman Pengotan.

 

1.3.      Teges/Artos Pralambang.

1.Dasar Uteran Palih Tiga                               :     Pinaka Patitis Desa Pakraman  Pengotan ring sajeroning ngrajegang Desa Pakraman sane kadasarin antuk Tri Hita Karana.

2.Uteran daun kutus marupa cakra                 :     Nyihnayang wawidangan Desa Pakraman Pengotan sane mepah dados kutus Banjar Pakraman sane suang-suang pakraman, suang-suang Banjar Pakraman madue parhyangan tur maiketan sareng sane lianan sekala kalawan niskala.

3.Sanggar Agung                                            :     Pinaka Parhyangan Ida Bhatara saking ngawit wenten Desa Pakraman Pengotan sane pinaka cihna panyikian saking kutus banjar pakaman.

4.Cecek badeng sane akehnyane roras

         ring panepining pralambang                         :     Pinaka pralambang kerthan bhatara sane sampun tami tinami saking riin tur kamargian olih krama salami awarsa nginutin wilangan sasih.

5.Sesanti                                                          : “KERTHA KERTI JAGADHITA”

   Kertha                                                          :     Kerthan Desa Pakraman Pengotan sane sampun ketami saking riin.

   Kerti                                                             :     Ngrestitiang lan ngrajenang.

   Jagadhita                                                      :     Kerahayuan lan kerahajengan.

   Teges sami                                                    :     Malarapan antuk ngrestitian lan ngrajegang kerthan Desa Pakraman Pengotan sane sampun ketami saking riin prasida nyujur kerahayuan lan kerahajengan jagat.          

1.4       Kawentenan Wewidangan Desa Pakraman Pengotan Manut Gambar / Peta

 

II    .AWIG – AWIG DESA ADAT PENGOTAN

            Mungguing awig-awig Desa Pakraman Pengotan mabuat pisan kawentenan ipun sajeroning midabdabin kasukertan pakraman, tur sampun kasurat mangdane langgeng.

            Awig-awig sane sampun kasurat sampun karesmiang tur sampun kalingga tanganin olih palungguh Bupati murdaning jagat Bangli ringrahina soma pon wuku ugu icaka 1919 tanggal masehi 29 Desember 1997 .

III. TRI HITA KARANA

3.1. PARHYANGAN

            1.   KAHYANGAN DESA ADAT

                        Ring jebag Desa Pakraman Pengotan sampun wenten Tri Kahyangan Desa                         Adat miwah Kahyangan sane seosan mekadi ring sor :

                       

                        a. Tri Kahyangan inggih punika :

                                    - Pura Puseh

                                    - Pura Penataran Bale Agung

                                    - Pura Dalem

                        b.Kahyangan Desa Adat seosan inggih punika :

                                    - Pura Batara Pingit

                                    - Pura Ulun Suwi

                                    - Pura Jro Kawan

                                    - Pura Jro Kanginan

                                    - Pura Pemaksan Ageng

                                    - Pura Pemaksan Alit

                                    - Pura Pengalangan

- Pura Tuluk Biyu ring gunung abang

- Pura Munduk Aya ring Gunung Abang

- Pura Dalem Penyungsung ring wewidangan gunung abang

- Pura Gelagah ring Pule

- Pura Dukuh Payung

- Pura Pendawa

- Pura Dalem Linjong

- Pura Bukit Catu

                                   

            2.   PEMARGIN YADNYA.

                        Pemargin yadnya piodalan ring kahyangan tiga miwah kahyangan sane                                                                                                                                                                                                                                                  siosan   Desa Pekraman Pengotan mekadi ring sor :

                        -.Pura Puseh /Pura Penataran Bale Agung ring Purnama karo,

                        -.Pura Dalem, ring Saniscara Kliwon Kuningan

                        - Pura Batara Pingit, ring Purnama Kenem

                        - Pura Ulun Suwi ring Purnama Kedasa

                        - Pura Jro Kawan ring Purnama Kedasa

                        - Pura Jro Kanginan ring Buda Kliwon Pahang lan Purnama Kapat

                        - Pura Pemaksan, ring Buda Kliwon Pahang

                        - Pura Pengalangan, Puyuh Wali Purnama Kapat

                        - Pura Tuluk Biyu ring gunung abang, Purnama Karo

                        - Pura Munduk Aya Ring Gunung Abang, Purnama Karo

- Pura Dalem Penyungsung ring wewidangan gunung abang, ring Purnama

   Karo lan Buda Kliwon Sinta

- Pura Gelagah Ring Pule, ring Purnama Kapat

- Pura Dukuh Payung ,ring Purnama Kapat

- Pura Pendawa, Purnama Kapat

- Pura Dalem Linjong Purnama Karo

- Pura Bukit Catu Purnama Koulu

                       

            3.  BUSANA

                        Manut perarem tur sampun kasungkemin busana ke pura kapatutang :

                        a. Meraga Lanang

                            - Destar Putih

                            - Kwaca Putih

                            - Kampuh Kuning

                            - Wastra manut arsa soang – soang

                        b. Meraga Istri

                            - Kwaca Putih wiadin Kuning

                            - Senteng Putih utawi kuning

                            - Wastra manut arsa soang – soang

           

            4.LELANGUAN

                        Ring wewidangan Desa Pekraman Pengotan, wenten kutus banjar pakraman. Soang soang banjar adat sampun maduwe gong sejaba delod desa lan dajan desa.

Tiyos ring punika ring desa adat taler wenten gong mekadi  :

1.                  Gong gede 1 barung. Medal rikanjekan wenten pujawali memargi ring Pura Penataran Agung.

2.                  Gong Kebyar 1 barung. Gong puniki pinaka petajuh Gong gede, mange rikala pujawali ageng ring Pura Penataran Agung.

3.                  Gong Barong. Mesimpen ring Pura kanginan pinaka pengiring tapakan Ida Betara ring Pura Kanginan.

4.                  Gong Bonangan. Mesimpen ring Pura Kawan. Pinaka pengiring lan tamburan Ida Betara ring Pura Kawan.

5.                  Angklung 1 barung. Mesimpen ring Pura Pengalangan, pinaka tamburan Ida Betara ring Pura Pengalangan.

6.                  Geguntangan, Mesimpen ring Desa pinaka pengiring krama mesanti.

7.                  Gender wayang. Mesimpen ring Pura Kanginan, pinaka Tamuran wayang sane ngelingin ring pura Kanginan.

                       

            5.     WEWALEN  

                        Wewalen sane marupa sasolahan sane kamargiang  ritatkala piodalan                           utawi upacara Dewa Yadnya ingih punika :

1.      Baris Sakral

Þ    Baris Jangkang, pemilet krama teruna 16 diri, masrana tumbak tan ngango jaler.

Þ    Baris Jojor, pemilet krama Teruna 16 diri, masrana tumbak

Þ    Baris Dadap, pemilet krama Bala Angkep 8 Diri masrana Jukung.

Þ    Baris Presi, pemilet krama Bala Angkep 8 diri masrana tutup

Þ    Baris Blongsong, pemilet krama Bala Angkep 16 Diri masrana tumbak lantang.

Þ    Baris Prancak pemilet krama Bala Angkep 16 Diri masrana tumbak lantang.

Þ    Baris Buntal, pemilet Krama Bala Angkep 8 Diri, masrana tumbak lan Tutup.

Þ    Baris Bajra, pemilet krama Bala Angkep masrana tumbak Bajra.

2.      Rejang Teruni, pemilet karma teruni 12 Diri masrana Kepet kemargiang pinih ungkur ring sesolahan Baris.

3.      Wayang Wong (Mahabrata lan Ramayana), kamarginag ring penglayud karya pinaka pemuput pujawali.

4.      Calonarang, Kemargiamg rikanjekan ageng karya nuju wenten  Pujawali ageng.

5.      Baris Babuang (Perang papah), kemarginag olih jerodulu lan krama teruni nuju piodalan Betara Sakti Pingit ring Purnama Keenem.

6.      Baris Pelengkungan (Banyol), kemargiang nuju memargi upacara melis mencingah ring Bale Agung Desa Adat Pengotan.

7.      Rejang Kraman, pemilet krama istri Jero Dulu, memargi rikala upacara Ngusaba Desa ring Pura Panti Desa Adat Pengotan ring Punama Karo, lan memargi ring Pura Dalem rikanjekan memargi Wali ring pura Dalem.

6.    RITATKALA NGAMARGING PUJAWALI WIADIN KARYA SANE            

    SIOSAN.

         Pemargin Pujawali utawi karya sane siosan ring wewidangan Desa Pekraman Pengotan kabiyayain olih Krama Pengarep Desa Adat. Sadurung karya utawi pajawali Prajuru miwah para panglingsir miwah para Pemangku ngawentenang pesangkepan nganinin pemargin karya utawi pujawali mekadi urunan, pepeson krama, pepalihan karya miwah nyudi baga-baga sane patut ngajegang karya punika. Rikalaning ngemargiang karya punika krama Desa Adat sami sampun pada siaga maduluran antuk pikayun subakti, suci nirmala turmaning pageh yasa. Para manggala miwah prajuru adat sami pada dabdab nuntun pemargin upacara mangdane labda karya.

         Rihuwus punika raris upacara kamargiang karuntutin antuk kidung wirama, sasolahan manut runtutan karya miwah tetabuhan gong. Krama Desa sami ngaturang bakti  pewacikan nganutin kulawarga soang soang. Saha makarya aturan para pitara lan Betara-betari sane ngelingin ring pegubugan. Soang soang krama ngaturang pangubakti nganutin kramaning sembah sane kaenter olih jero mangku lan prajuru adapt.

7.     UTSAHA NGINCEPANG DAGING AGAMA

          

Ritatkala ngincepang daging agama sane pinaka sesuluh ring angga sarira krama desa pekaraman sami prajuru adat setata mahutsaha ngawentenang pesantian-pesantian, sasuluh agama lan adat miwah nunas pewarah – warah ring guru wisesa, sios ring punika rikala rahinan purnama lan tilem sekeha teruna ngemargiang pemuspaan ring pura bale agung. selanturnyane kaicenin darma wecana olih sinunggil prajuru utawi bendesa adat.

Saking pemerintah Provinsi taler wenten program Pesraman Kilat taler kamargiang nganutin uger-uger saking pemerintah.

8.    KERAHAJENGAN PURA

              

Ring soang – soang tempek desa adapt sampun sregep memargi iringan pakemit,ngerahina sinunggil nincap wengi sane polih ririgan makemit tragia sampun nyujur ka pura.

9.    KESUCIAN PURA

        

Mangdane pura punika setata merupa genah suci utamane linggih Ida Betara sampun kemargiang daging awig – awig nganinin parindikan kacuntakaan.

10.    KAYANGAN RING SOANG –SOANG KRAMA UTAWI SIYOSAN

         a.Ring soang – soang krama sampun kekaryanang panunggun karang                         miwah ring soang – aoang bangunan sampun kadagingin pelangkiran.

        

3.2.    PAWONGAN

          

Kawentenan warga desa sane trepti prasida kacihnayang sakeng tata laksana krama sane nganutin awig – awig tur tragia ngemargiang wewangunan sekala niskala, mangda prasida nyujur tatujon keluarga Desa Pekraman nincapang kasukertan, ketreptian lan kerahajengan, reh punika pidabdab Desa Pekraman kepah dados tigang paletan inggih punika :

·         Palet   1  Parahyangan

a.       Nelebang astiti bhakti ring Ida Sang Hyang Wida Wasa malarapan antuk ngincepang widi tatwa.

b.      Ngigihang sangaskaning agama maduluran antuk nyejerang upacara upakaraning yadnya manut kerta sane ketami saking luhur.

c.       Ngajegang wewangunan pelinggih miwah papayonan parhyangan Desa Pakraman Pengotan Manut Purana Bali.

·         Palet   2  Pawongan

a.       Nincapang gilik saguluk kulawarga krama desa pakraman Pengotan  maduluran antuk pesamuan karma.

b.      Nincapang kasukertan, ketreptian lan karahajengan krama ring pemargin awig awig.

c.       Ngemangehang cita rasa paras paros sarpanaya salunglung sabayantaka.

1.      Palet  3  Palemahan

a.       Ngerajegang keasrian, keresikan palemahan.

b.      Ngemagngehang  wates palemahan tri mandala miwah tri angga.

c.       Ngusahayang pangupon ngupon manut pidabdab guru wisesa.

Sane mangkin mangda tatas pretyaksa uning ring kawentenan saparatingkah krama desa Pengotan makadi ring sor :

1.      Krama Desa Pakraman Pengotan

         Krama Desa Pakraman Pengotan  makuweh ipun 3.449. diri, inggih punike lanang 1.749 diri , istri 1.700 diri ,Pengarep 205 diri ,Bala angkep 560 diri, lan sekehe teruna 409 diri. Cacah Jiwa  manut sakolahan krama ingih punika : Sekolah Dasar  / kejar paket A 2.168 diri,SMP 525 diri, SLTA 57 diri, Lan Perguruan Tinggi 9 diri.Pangupa Jiwa Krama minekadi : Karya petani  2.069 diri, Dagang 138 diri, Astagina 140 diri, Pegawai 150 diri , Karya Swasta 225 diri.